allauto.ge

დაიმლერი გოტლიბ (Daimler Gottlieb) - გერმანელი გამომგონებელი. კ.ბენცთან ერთად ითვლება მსოფლიოში პირველი ავტომობილის შემქმნელად. დაიბადა 1834 წ. 17 მარტს შორნდორფში, ბიტენბერგთან ახლოს. დაამთავრა ლათინური სკოლა. მუშაობდა სხვადასხვა მანქანათმშენებელ საწარმოში, სწავლობდა ტექნიკურ სასწავლებელში, შემდეგ შტუტგარტის პოლიტექნიკურ ინსტიტუტში. ინსტიტუტის დამთავრების შემდეგ მუშაობდა ინჟინრად სხვადასხვა საწარმოში, იყო ინგლისსა და საფრანგეთში. 1872 წლიდან – პირველი ოთხტაქტიანი ძრავის გამომგონებლის ნიკოლაუს ოტოს ფირმაში. ათი წლის შემდეგ დატოვა ფირმა თავის კოლეგასთან ვილჰელმ მაიბახთან ერთად. მათ შტუტგარტთან ახლოს მდებარე პატარა ქალაქ კანშტატში 1883 წ. ერთობლივად დააფუძნეს საკუთარი კომპანია და აღარც დაშორებიან ერთმანეთს, მთელი დრო დაუთმეს ძრავების კონსტრუირებას. 1885 წ. დააპატენტეს გერმანიაში პირველი ბენზინზე მომუშავე შიგაწვის ძრავა.
დაიმლერი ეძებდა, რაში შეიძლებოდა ძრავის გამოყენება. თავდაპირველად დაამონტაჟა ველოსიპედზე, რომლითაც მოაწყო პირველი მგზავრობა 1885 წ. ამ სატრანსპორტო საშუალებას შემდგომ ეწოდა მოტოცკლი. მისი მასა იყო 90 კგ, მაქსიმალური სიჩქარე 12 კმ/სთ.
1886 წ. დაიმლერმა გამოსცადა ოთხთვლიანი ეკიპაჟი, მაქსიმალური სიჩქარით 18 კმ/სთ.
1889 წ. დაამზადა პირველი ოთხთვლიანი ეკიპაჟი, რომელიც თავისი პარამეტრებით ითვლება ერთ-ერთ პირველ ავტომობილად. ეს ავტომობილი უკვე ვარგისი იყო გასაყიდად. 1890 წ. დაიმლერმა დააარსა მსოფლიოში პირველი საავტომობილო ფირმა., სახელწოდებით “დაიმლერ მოტორენ გეზელშაფტ”.
საინტერესოა, რომ გოტლიბ დაიმლერმა და კარლ ბენცმა თითქმის ერთი და იმავე დროს გამოიგონეს თავისი პირველი ავტომობილი. ამასთან, მათ ქალაქებს შორის დაშორება სულ 95 კმ იყო, მაგრამ სიცოცხლეში ერთმანეთს არასდროს შეხვედრიან. თუმცა XX ს-ის 20-იან წლებში მათ მიერ დაარსებული კომპანიები შეერწყა ერთმანეთს და გადაიქცა ყველასათვის ცნობილ კომპანიად “დაიმლერ-ბენცი”.
გოტლიბ დაიმლერი გარდაიცვალა 1900 წ. 6 მარტს.